प्रधानमन्त्री एवं नेपाली काँग्रेसका सभापति शेरबहादुर देउवाले आगामी चुनावमा आफूलाई नभएर भक्तपुरका पार्टी सभापति दुर्लभ थापालाई हराएर देखाउन नेकपा (एमाले) नेता महेश बस्नेतलाई चुनौती दिएका छन् ।
शुक्रवार भक्तपुरबाट पार्टीको वडा अधिवेशन शुभारम्भ गर्दै प्रधानमन्त्री देउवाले थापालाई हराएर देखाउन बस्नेतलाई चुनौती दिएका हुन् । केही दिनअघि भक्तपुरका एमाले नेता बस्नेतले भक्तपुरमा शेरबहादुर देउवा चुनावमा लड्न आए आफूले सहजै जित्ने बताएका थिए ।
देउवाले लोकतान्त्रिक प्रक्रियाबाट नेतृत्व चयन गरी पार्टी सङ्गठनलाई थप सशक्त बनाइने भन्दै महाधिवेशन सफलताका लागि एकताबद्ध भएर लाग्न नेता कार्यकर्तालाई निर्देशन दिएका छन् । सभापति देउवाले आगामी दिनमा काँग्रेस बलियो र सशक्त हुने विश्वास व्यक्त गरेका छन् ।
सभापति देउवाले भक्तपुरको सूर्य विनायक नगरपालिका वडा नम्बर ५ मा वडा अधिवेशनको उद्घाटन गरेका छन् । वडा अधिवेशन र २१ भदौदेखि निर्वाचन हुनेगरि यसअघि नै काँग्रेसले कार्यतालिका सार्वजनिक गरिसकेको छ । निर्वाचनबाट वडा सभापति, कार्यसमिति र क्षेत्रीय प्रतिनिधि वडा अधिवेशनबाट चयन हुनेछन् ।