नेकपा (एकीकृत समाजवादी) का अध्यक्ष माधवकुमार नेपालले केपी ओली र महन्थ ठाकुरको गठबन्धन दक्षिणपन्थी गठबन्धन भएको आरोप लगाएका छन् । युवा सङ्घ, नेपाल लुम्बिनी प्रदेशद्वारा शनिबार नेपालगन्जमा आयोजित प्रदेश भेला एवं पिपुल्स भोलेन्टियर घोषणा कार्यक्रमलाई सम्बोधन गर्दै अध्यक्ष नेपालले ओलीको दक्षिणपन्थी गठबन्धन सबै उपलब्धिलाई तुहाउन चाहनेको गठबन्धन भएको आरोप लगाए ।
उनले आफुहरुको गठबन्धन मुलुक निर्माणका लागि भएको गठबन्धन भएको दाबी गरे । एमालेका अध्यक्ष ओलीप्रति आक्रामक देखिएका नेपालले ओलीमा क्रान्तिकारी ज्वाला निभिसकेको बताएका छन् । उनले एमालेलाई ओलीको निजी कम्पनीको रूपमा परिणत भएको आरोप लगाए । त्यस्तै उनले एमसीसी नेपालको हितमा छ भन्ने ग्यारेन्टी भएपछि मात्रै अघि बढाइने बताए । एमसीसीका प्रतिनिधिहरूसँगको भेटमा उनले नेपाल स्वतन्त्र राज्य भएको भन्दै सुरक्षासँग उक्त परियोजना जोडिएको छ कि छैन भन्ने प्रश्न गरेको उनले बताएका छन् ।
कार्यक्रममा केन्द्रीय सदस्यहरू दलबहादुर सुनार, कौशिला सिंह, कैलालीका अध्यक्ष दीर्घ सोडारी, रुपन्देहीका अध्यक्ष राजु गुरुङ, युवा सङ्घका अध्यक्ष नरेश शाही, युवा सङ्घ लुम्बिनी इन्चार्ज सरिता श्रीस लगायतले पार्टीलाई मजबुत बनाएर अघि बढ्ने जनाएका थिए ।